رواية من انت الحلقه الاولي الديك بيدن كوكو كو ..
وهى لسا مانمتش ولا عيونها غمضت .. بتستنى الوقت يعدى عشان تقف فى البلكونه وتشوفه .. مغرمه وهيمانه فى حبه وهو ولا هو هنا .. هادى وراكز اصماله على شبابه .. من تكون .. من انت .. ولماذا تعلقت روحى بك ؟ اسئله بتسألها لنفسها كل شويه .
كارما : واقفه بعيون حيرانه .. يمين وشمال منتظره الوقت يعدى .. اهووو .. خلاص نزل وابتسمت مع نفسها مجرد ما بتشوفه بتحس انها طايره فوق السحاب
الشاب : بيركب عربيته لا هى فخمه ولا عاديه متوسطه .. وفى قمة شياكته . فتح الباب وواقف لحظه نزل النضاره من على عيونه وابتسم وغمز لكارما ودخل عربيته واستعد للانطلاق ..
كارما : مسكت ايدها الاتنين فى بعض حطتهم على صدرها بفرحه .. معقول هو واخد باله طول الفتره الا فاتت دى .. ودخله من البلكونه جرى .. وفجأه رجعت تانى براسها بس . وبتبص عليكو انتو .. ايوا انتو ..
كارما : اعرفكم بنفسى كارما سعيد .. عندى 24 سنه . خريجة إعلام .. وقاعده فى البيت ما تسألوش ليه لانى مش عارفه قاعده رخامه والدى الحج سعيد صاحب سوبر ماركت السعيد .. والدتى الحجه سميره .. دى بقى مرات ابويا الا هى أمى هههههه .. ايوا بالظبط كدا هى سميره وهو سعيد .. فابقت سميره وسعيد .. ماما غاويه قاعده فى البيت زيى.. وبابا بقى غاوى شغل هو واخويا رامى خريج تربيه وعاملى فيها استاذ بقى وكدا .. ودخلت من البلكونه ورجعت براسها تانى وبتشاور بايدها ليكووو وبتضحك . اشفكو بقى مع من انت . اوعى يكون حد فيكو عارفه وبتضحك وغمزت لكم
*******************
رامى : هو انتى على طول لازقه فى البلكونه .. وتطلعى منها تنامى ..دا اسمه ايه بقى
كارما : هو انت مفيش شغلانه وراك غيرى
رامى : بدال ما انتى سايبه امك كدا لوحدها ساعديها فى شغل البيت
كارما : انت مالك انت
رامى : بيقدم عليها .. وهى دخلت جرى لمامتها .. كارما : ياماما ابعديه عنى بقى
سميره : فى ايه يا رامى ما تسيبها فى حالها
رامى : عايزها تساعدك فى البيت بدال واقفتها فى البلكونه ونومها طول النهار
سميره : حاوطت بنتها بايديها .. ماهى بتساعدنى مين الا قالك مابتساعدنيش .. هى الا بتروق الشقه
رامى مسك راس كارما بإيده وبينزلها لتحت .. تتعلم الاكل عشان لما تتجوز ماترجعش من تانى يوم
كارما : بتزق ايده .. وبتضربه على صدره انت مالك انا ها اتجوز واحد مش ها يخلينى اعمل اكل
رامى : ليه ما بياكلش وإلا ها يصوم عن الاكل من ساعة ما يشوف وشك وشدها وبيعصر راسها على صدره بايده
كارما : ههههههه وسع يارخم فرهدتنى .. انت مدرس انت العيال بتستحملك ازاى
رامى : عيال ..قولى انا الا مستحملهم ازاى .. وبيبص لامه .. انتى مش ناويه تجوزينى بقى وتفرحى بيا وبعيالى
سميره : انت قولتلى وانا قولت لاء .. عندك واحده
رامى : بيبص وراه وجمبه .. عندى فين
كارما : هههههههه والله غبى .. والله غبى
رامى : بهزار .. كان فى واحده ها اموت عليها . وامى خدتها ههههه
كارما : قصدك زتونه .. انت اخرك زتونه مش واحده .. ماما اقولك حاطت عينه على مين
سميره بأنتباه : مين
كارما : سلوى بنت طنط ناديه
رامى : بيضحك .. ايوا وبيضرب كارما بهزار .. ايوا يا ظريفه
كارما : مبتسمه .. وفرت عليك النحنه والمقدمات انا غلطانه
رامى : طيب ياله على برا خلينى اشوف الدنيا الا انتى عكتيها وكارما طلعت على برا
سميره : مش لما نجهز شقتك ونمحرها يارامى
رامى : نخطبها ياماما .. ونتفق على الفتره الا تناسبنا
سميره : ان شاء الله ها افاتح ابوك ونروح نتقدم
كارما : صباح الخير يابابا
سعيد : صباح النور يا كوكو .. رايحه على فين
كارما : انا على موعد مع السرير .. تصبح على خير ياحج
سعيد : لسا كنتى بتقولى صباح الخير لحقت بقت تصبح على خير
كارما : الوقت ياحج ماعتش فيه بركه ما انت عارف .. تصبح على خير بقى
سعيد : لا البسى وتعالى معايا تحت فى السوبر ماركت عايزك
كارما : ها انام بس واقوم وانزلك على طول
سعيد : لا اشربى فنجان قهوه عشان تنزلى معايا
كارما : كدا مفهاش نوم ودخلت المطبخ بتعمل مج كبير قهوه
رامى : ههههههههه اتقفشتى .. هو دا الا ها يظبطك
كارما : اهئ اهئ .. وبتحط راسها على صدر رامى بنوم .. عايزا انام يابشر خلى عندك رحمه واطلع قوله
رامى : انا اقوله .. اوعى كدا وبيزقها بعيد عنه .. وخرج وبعت بوسه فى الهوا مع نفسك يا قطه
كارما : روح الهى يقفشك .. وخلصت المج وخدته ودخلت اوضتها .. لبست وشربت القهوه .. ونزلت مع ابوها
سعيد : صباح الخير يا ولاد
العمال : صباح الخير ياحج
سعيد : محمود هات الامانه وتعالى
محمود : اتفضل ياحج
سعيد : جبتى يا كارما الا قولتلك عليه
كارما : ايوا يابابا
سعيد : خدى يابنتى دول 50 الف روحى حطيهم فى حسابى فى البنك وتعالى حلاوتك محفوظه
كارما : شالت الظرف حطته فى شنطتها وخرجت بهدوء .. ماشيه من شارع جانبى هادى وفاضى ومصدعه وعيونها مدخششه ومره واحده حست الا بيحط ايده عليها .. وبيشدها
كارما : بخضه اعاااا ..
الشاب : ماتخفيش يا كارما .. دا انا
كارما : بعصبيه انت ازاى تعمل كدا
الشاب : هششششش انتى ايه الا ممشيكى من الصبح كدا من الشارع دا
كارما : انا على طول بمشى منه وكمان انت تعرف اسمى منين
الشاب : يعنى كل يوم بتقفي فى البلكونه وتنتظرى لحد ما انزل وكمان بتسألينى اعرف اسمك منين .. وبهمس انا كمان مراقبك
كارما بإنكار : هو اى واحده واقفه فى البلكونه يبقى عشانك .. وسع كدا وخرجت بسرعه وجسمها كله بيتنفض .. طلع وراها بسرعه يمسكها ..
احدالاشخاص : ولا اهووو .. وطلعو يجرو ورا الشاب الا مسك كارما وطلع يجرى بيها
كارما : بصريخ وخوف .. ايه فى ايه ومين دول
الشاب : مش عارف .. اجرى عايزين يخلصو عليا بيطاردونى من ساعة ما خرجت من البيت
كارما : وانت ماسك فيا ليه سبنى .. انا مالى
الشاب : شكلهم مجرمين ومابيتفهموش وممكن تروحى فى الرجلين .. وبيشدها وبيجرى بيها
احد المجهولين 1 : دخل هنا خليك وراه اوعى تسيبه
مجهول 2 : ومين الا معاه دى احنا عندنا اوامر نجيبه لوحده
مجهول 1 : هاتوهم الاتنين . ها تسيبها تبلغ عننا
وبدئو كذا شخص يتكاترو عليهم الاتنين .. وخدوهم
كارما بصوت عالى : الحقونا .. يالهوووى
مجهول 1 : ضربها فى وشها اخرسى
الشاب : اداله بالروسيه وهو مربوط ايده .. ما تدمش ايدك عليها يا ابن ال….
مجهول 1 : لسا ها يتهجم عليه يضربه
مجهول 2 : اهدى يامحى ماعندش اوامر نلمسه .. احنا نسلمه وبس .. وانتى ياحلوه اهدى كدا وخليكى عاقله
كارما : بعياط انتو عايزين مننا ايه
الشاب : هى ملهاش دعوه بيا .. سبوها تمشى انا معرفهاش
محى : احنا لاقناكو مع بعض وها ناخدكو مع بعض ومش عايز كتر كلام .. ورش فى وشهم مخدر الاتنين وصلو مكان مهجور كبير جدا وفاضى .. كارما بتفتح عنيها بتقل .. لقت نفسها متربطه على عمود .. وقصادها الشاب هو كمان متربط على عمود
محى : أكرم اتصلت على الباشا
اكرم : ايوا .. واول ماعرف اننا جبناه فرح وقالى انه جى فى الطريق وبعد ما الوقت عدى وكارما والشاب عاملين ازعاج كبير.
اكرم : اتفضل يا باشا
محى : بيرفع ايده عن راسه . احنا فى الخدمه سعتك
الشاب بصدمه : انت
محى : ادم باشا احنا وعدنا ووفينا وعدنا واهو قدامك اهووو ..
ادم : بيشاور بعكازه الا ماسكه ومين دى
محى : كانت بتجرى معاه ومانعرفش هى مين وهو مش عايز يقول هى مين
الشاب : انت عايز منى ايه
ادم : حد يقول لابوه عايز منى ايه وبيشاور للرجاله فكوهم انا قولت محدش يلمسه يا اغبيا
محى : متأسفين سعتك .. وفكو كارما والشاب
ادم قرب على الشاب وبيحضنه تحت نظرات كارما الا مش فاهمه حاجه .. وازاى اب بيخطف ابنه
الشاب : ابعد عنى انا مش ابنك .. انا ابن راجل على قد حاله وست مكافحه هما لو عايشين كانو قالولك
ادم بإنكار : لا والف لاء .. انت ابنى ومن صلبى .. انت ولى العهد الا ها يورث ويجيبلى احفاد تشيل اسمى انا مليش غيرك وبيشاور عليه انت عمر ادم
عمر : خلى رجالتك يخرجونى انا وكارما هى ملهاش ذنب فى الا بيحصل بينى وبينك .. اهلها ها يقلقو عليها
ادم : قرب على كارما وابتسم انتى حبيبة ابنى والا ها تجيبى ليا ولى العهد شكله طالع شقى لابوه
كارما : بتبعد ايده .. انا معرفش ابنك ولا ابن غيرك دا سبونى أمشى اهلى ها يقلقو عليا
ادم : انسى ياحلوه ..كنتى مع ابنى وحايبنكم مع بعض وتقولى ماتعرفهوش . خلاص انتى ها تبقى مراته ام ولاده الا هما احفادى
عمر : انت اكيد راجل مش طبيعى .. روح شوف واحد غيرى يبقى ابنك ويبقى ولى العهد
ادم : مسك عمر بعنف برغم كبر سنه وعكازه الا مسكه زينه مش أكتر الا ان صحته كويسه جدا .. لما تتكلم مع ابوك اتكلم بأدب
عمر : انت مش ابويا .. ولو ابويا زى ما بتقول سبتنى طول السنين دى ليه
ادم : دا موضوع كبير ومش وقته .. انت وهى ها تتجوز ودا كلام نهائى
كارما بصريخ : انتو مجانين .. خرجونى من هنا وبتجرى على الباب .. خرجونى وكل ما حد يقرب من رجالة ادم عليها عمر يضربه بوحشيه .. وادم امرهم يسيطرو عليه كلهم .. وقدرو بعد وقت كببير يسيطرو على عمر وكتفوه وخدروه هو وكارما الا كانت منهاره
***********
تتوقعو ايه الا ممكن يحصل معاهم وازاى عمر وكارما ها يتصرف
بقلم : لبنى طارق
